كالمعتاد يبدو اني مش هبطل هوايتي المحببة في الكسل و التقاعس عن اداء واجبي التدويني لكني اليوم اعود و قد انتهت حالة الاكتئاب السابقة و الحمد لله علشان اكلمكم عن حاجة حلوة قوي ، و بداية احب اسأل :حد فيكم شاف فيلم ( تخيل الارجنتين ) أو :IMAGINE ARGENTINA ?
عموما لو ما حدش شافه مش مشكلة و دلوقتي هتعرفوا ليه ، الفيلم ده واضح من اسمه انه بيتكلم عن الارجنتين و تحديدا في حقبة السبعينات اللطيفة و اللي ربنا غضب علية و درس امريكا اللاتينية زي حالاتي اكيد هيكون عارف ان حقبة السبعينات في الارجنتين و معظم دول امريكا اللاتينية كانت حقبة سوده و منيلة بنيلة لان الارجنتين لوحدها شهدت حوالي من 20 الف الي 50 الف حالة اختفاء قصري لمعارضين و صحفيين و و مثقفين علشان النظام الارجنتيني حس انهم - الكلاب بتوع المعارضة - عاملين له صداع !!!
الفيلم بتدور احداثة حول البطل ( انطونيو بانديراس ) و هو فنان معارض للنظام المستبد ، تتعرض زوجته ( ايما تومسون ) للاختطاف علي يد البوليس السياسي الارجنتيني و في رحلته للبحث عنها و استمرار معارضته للنظام الفاشي من خلال مسرحياته تتعرض ابنته ايضا للاختطاف و يتعرض هو للضرب المبرح .
المهم بقي انه في رحلة البحث عن زوجته بيلتقي بضحايا التعذيب او الاعتقال و اسر الضحايا و كل واحد بيسرد مأساته ، لحد ما في اخر الفيلم بيعرف يلاقي مراته اللي هربت من المعتقل ، و طول الفيلم تلاحظ - عزيزي المشاهد - مشاهد التعذيب اللطيفة و الاغتصاب المستمر و المنهجي للمعتقلين و خصوصا للزوجة و الابنة لدرجة ان الضابط بيجيب الام و بيجيب امامها العساكر و بيطلب منها اختيار الشخص اللي هيغتصب بنتها !!! شئ قمة في البشاعة و انتهاك ادمية الانسان و عدم مراعاة انسانية الشخص بالاساس .
المهم - عزيزي المشاهد - لو اعصابك ضعيفة بلاش تشوف الفيلم و لو اعصابك قوية حاول تمسكها و ما تنهرش .
و انا بفتكر احداث الفيلم البشع ( تخيل الارجنتين ) طرأ علي دماغي سؤال اكيد مجنون :الواد محمد اللي عنده 12 سنه ده يعني ما يعرفش العمي من السما عمل ايه عشان عمو الضابط يطلع عليه ابداعات الدراسة في كلية الشرطة مضاف ليها كام سنه خدمة في الداخلية مضاف اليهم عقد نفسية كامنة منذ الطفولة - زي ما قال عمو سيجموند فرويد - و يعذبه بكل قسوة و وحشية و يصعقة بالكهربا في اماكن حساسة في جسمه و كمان يحقق الانجاز الاكبر و يضربة باله حادة في صدرة لدرجة تؤدي لثقب في القفص الصدري ؟يا تري عمل ايه محمد الله يرحمة؟ مشي في الشارع حافي ؟ و لا راح المدرسة من غير ما يعمل الهوم ورك ؟عمل ايه محمد حد يعرف ؟حد يعرف ازاي قدر انسان يعمل كده في طفل ممكن يكون زي ابنه ؟قولولي ازاي لان انا ماعدش فيا عقل علشان افكر و انا حاسه ان كل العالم اتجنن من حولي .
ليه ده يحصل ؟ الله يخرب بيت حقوق الطفل و حقوق الانسان اللي قرفنا منها من كتر الكلام عنها و هي قافلة عنيها و ساده ودنها عن محمد اللي ممكن يكون اخويا او اخ او ابن اي حد فينا . مش ممكن الولد ده يكون عالم و ياخد نوبل او يكون رجل قانون شريف او دكتور مشهور او مهندس عبقري او حتي ضابط بوليس مش بيعذب الاطفال .
ثم نأتي للموضوع الاجمل :ايه رايكم يا جماعه بعد كل ده البلد دي ينقعد فيها ؟ تعالوا اقول لكم فكره حلوة قوي : ايه رايكم كلنا - يعني ال80 مليون - نسيب البلد و نطفش و ساعتها بقي البوليس مش هيلاقي حد يعذبه صح ؟؟؟
الي كل شعب مصر احب اقول اني النهارده حاسه بالعار لاني عايشه في بلد بيموت فيها الاطفال مش بس بالسرطان لا كمان بالتعذيب ، لا فعلا صدق اللي قال ان مصر دي حاله متفرده من نوعها و اللي دايما يتكلموا عن خسوسية الحالة المسرية !!!
اخص عليكي يا مصر ما كانش العشم تعملي كده فينا ، طيب الارجنتين جايز يكون ليها مبرر و ده مش مجاله دلوقتي بس انتي ليه تعملي فينا كده ؟
بس مصر ترد و تقول : الناس اللي عذبوا و بيعذبوا دول مش ولادي و رفضوا انهم حتي يعتبروا دمي دمهم و عزلوا نفسهم عني من زمان .........................
يا بنتي بلاش تكوني انتي و الزمن عليا دا انا شوفت كتير و مش سهل علي الام انها تشوف ولادها بيموتوا امام عنيها ......
انتي قلبك انفطر علي واحد بس ، طيب انا قلبي بينفطر كل يوم من 3286 سنه من يوم ما دخل الفرس مصر ، كل يوم قلبي بينحرق و انا كاتمة حزني جوا قلبي .
و تبكي مصر و اجن انا و اعود لاسألها : طيب يا مصر ليه ده بيحصل و ليه وصلنا للمرحلة القاسية دي ؟
فتجيب مصر و كان ليا مع مصر حديث طوييييييل تشوفوه الحلقة القادمة ان شاء الله و محدش اعتقلني بتهمة الفضفضة مع مصر ....
هناك ٣ تعليقات:
هاى يا ساره..وحشانى طحن..مدونتك رائعة وانا متابعه فيها وياريت تكتبى اكتر لانى بستمد ثقافتك منها وبتعلم منك كتير وبعرف اد ايه انتى انسانه ناضجه ومفكره وثقافتك واسعه, وانتى عارفه انى بدرس فى مجال علم النفس فالكلام اللى بتكتبيه انا مدرستوش ولا اعرفه وبالتالى انتى بتخلينى استفيدواتعلم من حاجات مش فى مجالى وبجد باستمتع فى المدونه بتاعتك..يارب تستمرى تكتبى دايما وكنت كمان عايزه اهنيكى واهنى كل المصريين بخروج اسراء من السجن اللى اعتقلت بسبب كتاباتها على الفيسبوك..على فكره انا كلمت اصحابى عنك وبالاخص زميلى معتز شلبى لانه احد اعضاء حزب الغد وطلب منى لينك المدونه بتاعتك عشان يتواصل معاكى وهو زميل محترم وعزيز عليا....بشكرك ياسارة وعايزه اقولك انك فعلا وحشتينى ووحشتنى ايام شرم.....شذى SHAZA
السلام عليكم انا مش مصرية لكن قلبي معاكم ..متل ماقلتي انا شفت الفلم وصدقني عجبني جدا لانه مش فلم اكشن او اي حاجة فضية تنية فيلم انساني والهمني اكتب قصة عن الحصل في تلك الفترة ..وكان نفسي اكتب عن البحصل في مصر وسوريا وفلسطين وخاصة غزة لكن مثل العادة احنى بنكت عن الحاجة بعد ما تخلص لانه في وقتها بنكون خرس اتمنى ان اقدر اكتب وشكرا ليكم كلكم وانا والله بحب كل اهل مصر مواطنة اردنية
دائما تذكرون مصر وسوريا وفلسطين والعراق مينذكر رغم ان ماساته اكثر من كل بلد للاسف
إرسال تعليق