مع الحسين .

" كنت في كربلاء ...

قال لي الشيخ : ان الحسين

مات من اجل جرعة ماء "

عندما قرأت هذه الكلمات التي كتبها الشاعر العبقري امل دنقل في قصيدة :( من اوراق ابو نواس ) اول ما شعرت به هو الذل ! فعندما يموت حفيد رسول الله صلي الله عليه وسلم من اجل جرعة ماء - حتي لو حدث ذلك في قصيدة - فذلك عار علينا جميعا كمسلمين .

لكن لو تحدثنا عن عارنا كمسلمين ، فاعتقد انه سيتجاوز كثيرا موت الحسين من اجل جرعة ماء .

"و تساءلت كيف السيوف استباحت بني الاكرمين ........

فأجاب الذي بصرته السماء .......

انه الذهب المتلألئ في كل عين "

صدقت ايها الشاعر ، فالذهب المتلالئ في كل عين جعل الخليفة ( المسلم ) يزيد بن معاوية بن ابي سفيان يطلق جيوشه علي الامام الحسين حفيد الرسول صلي الله عليه و سلم و ابن الامام علي بن ابي طالب و ابن السيدة فاطمة الزهراء ابنة الرسول ، و ليت الامر يتوقف علي القتل بل يتعدي ذلك للتمثيل بجثة الامام كي يكون عبره لمن يعتبر .

و نلاحظ اعزائي المشاهدين ان الخليفة السابق معاوية بن ابي سفيان ( سيدنا معاوية ) كان ، قد قتل الامام الحسن بالسم وقت ان كان خليفة و ذلك كي لا يظهر من المسلمين من يقول ان الحسن هو الاحق بالخلافة ، رغم ان الحسن كان قد تنازل عن الخلافة لمعاوية بن ابي سفيان ، يعني الحسن كان مش عايزها لكن هذا ما تفعلة السياسة .

و من غير رخامة ، اكيد فيه ناس كتير تعرف ان اول ناس اقنعوا الحسين بالثورة و في نفس الوقت اول ناس تخلوا عنه هم الاعزاء الاحباء اهل العراق الشقيق ، يعني اللي باعوا الحسين و ابو الحسين اكيد اكيد اكيد يبيعوا صدام حسين و ابو مصعب الزرقاوي و لو قعد بوش في العراق اكيد برضه هيبيعوه .

" ان تكن كلمات الحسين ....

و سيوف الحسين ......

و جلال الحسين ......

سقطت دون ان تنقذ الحق من ذهب الامراء ...

افتقدر ان تنقذ الحق ثرثرة الشعراء ؟؟؟؟"

يعني من الاخر كده مفيش فايدة يا صفية ، و غطيني و صوتي !!!!! الراجل جاب الحكاية من الاخر ، اذا كان الحسين بكل جلاله و نسبه الشريف اندبح و سقط تحت نصال السيوف و سنابك الخيول ، فايه اللي يخلي لكلامنا قيمة او لازمة او اهمية ؟ طيب و اللي يتكلم يا حلوين ؟ اعرف شوية ناس صدقوا نفسهم و اتكلموا و اعتقد ان انتم ممكن تكونوا عارفين النتيجة ايه .

و ده بيقودنا لفكرة عبثية تانيه : ياتري ده قدر مين بالضبط : قدرنا نموت الحسين و نقعد نعيط عليه و لا قدر الحسين انه يحارب لوحده و يتقتل من غير ما حد يساعده او يسانده ؟

كنت في كربلاء .....

و ياريتني ما كنت في كربلاء

يا ريتني ماكنت في كربلاء علشان ماشوفش الحق بيتوزن مع الدهب و كفة الذهب بترجح .

يا ريتني ماكنت في كربلاء علشان ما اشوفش الشرف و الحق بيضيع ، جايز لو ما كنتش شوفت كان بقي عندي امل في الحياه ، لكن مين يقدر يرجع الزمن ؟؟؟

و اخيرا و ليس اخرا : فزورة 15 رمضان :

عزيزي المواطن :

تخيل انك بتشتغل في مصنع و بتأخد في الشهر 200 جنيه بحالهم ، و حضرتك متجوز و عندك عيال و عايز تاكل و تودي العيال المدرسة و تديهم دروس او حتي مجموعات تقوية ، و كمان تدفع فواتير مياه و كهرباء و تليفون ، و بعد كل ده المصنع اللي انت بتشتغل فيه ياريته بيخسر ، لا ده بيكسب و بيكسب كويس قوي كمان و الادارة مش موافقة توزع الارباح و بتقول ان المصنع بيخسر ، علما ان مرتب مدير المصنع بيعمل شئ و شويات في الشهر . ماذا تفعل عزيزي المواطن لو ما عملتش اضراب انت و الكام 27000 عامل اللي شغالين معاك و بيعيشوا نفس الظروف ؟؟؟؟؟؟

ترسل الاجابات يوم 17 رمضان الي وزارة الاستثمار و الي جريدة الاهرام و الاخبار و الجمهورية و المصري اليوم و الدستور و الوفد و بلاش الغد علشان محدش يقول اني قلتلكم علي حاجه ،و لو حل الفزورة ما ظهرش يوم 20 رمضان ممكن تاخدوا الطريق الاسهل و تبعتوا لربنا في ليلة القدر و ده يكون احسن .

حل الفزورة في التدوينة الجاية ،

و نلتقي بعد الفاصل .

ارني الله

في البداية كل سنه و حضراتكم طيبين بمناسبة شهر رمضان المبارك - و ياريت محدش يفهمني غلط علشان مبارك دي - رغم ان التهنئة بالشهر الكريم دي جت متأخرة شويتين ، بس خلينا في المهم اللي انا شخصيا شايفة انه مناسب جدا للايام الجميلة اللي احنا عايشينها دي .
بداية اعزائي المشاهدين احب اسألكم : انتم شايفين ان احنا في مصر نعرف ربنا باي شكل و من قريب او من بعيد ؟ كل واحد حر في اجابته و طبعا انا كمان عندي اجابتي اللي اتمني انها ما تكونش صادمة ليكم في الايام المفترجة دي ، و هي اننا يا مصريين شعب ما يعرفش ربنا !!!!!!!!
ايه ، اتصدمتم ؟ طيب بلاش قلة ادب ، معظمنا ميعرفش ربنا ، ايه كده كويس ؟؟؟
طيب قبل ما تزعلوا مني و تحلفوا ما تعرفوني تاني استنوا شوية اقول لكم ايه : كل الناس بتصوم و بتصلي و بتتكلم في ربنا ، بس مين في دول بيراعي ربنا في تصرفاته او شغله او معاملاته مع اللي حواليه من اول البني ادمين لحد القطط و الكلاب اللي الناس بتدخل فيهم الجنة والنار ؟
هتقولوا ان اللي انا شفتهم دول قله من التفاح الفاسد ، لكم يا اصدقائي ابتسم في مرارة و اقول : ليه هو التفاح كله فسد فجأة؟ معلش اصل انا جبت اخري خلاص و برضه هقول لكم ليه .
عزيزتي الفتاه : كام مره ركبتي تاكسي او ميكروباص مع واحد مشغل قران و قعد يبص لك في المرايه ده لو ماحاولش يتحرش بيكي ؟
اعزائي المواطنين ، كام مره لاقيتم في حياتكم ناس بتتكلم عن ربنا و مش بتسيب المسجد و المصحف و اكتشفتم انهم في التعامل ، سوري و لامؤاخذة زبالة ؟
طيب كام مرة في رمضان ده شفتم ناس بتشتم بالدين و بتزق بعضها و بتتدافع لدرجة الموت في اتوبيس او ميكروباص؟ كام بنت اتشتمت و اتزقت و ملاقتش راجل يقف يتكلم عن حقها اللي ضاع من غير ما يقدم مساعدة حتي ؟ كام دكتور موت مريض و لا كام
موظف خد رشوة و لا كام ضابط عذب بني ادم ملوش ذنب ؟
و بعد كده وده اللي مجنني تلاقي حبايبكم اللي انتم عارفينهم بيتكلموا عناهمية ارتداء النقاب و عدم مصافحة النصاري و اضطهاد السافرات - اللي زيي كده - لحد ماربنا يهديهم . لا و اللطيف في الموضوع ان كل مانتكلم اكتر في الدين الناس يبقي ماعندهاش دين و كأن مقولة العظيم برنارد شو تتحقق و هي ان كل واحد بيتكلم في اللي ناقصه واحنا ناقصين دين علشان كده عمالين نتكلم فيه .الازمة اصبحت اننا حولنا الدين لشوية مظاهر فقط - و انا لا انكر علي اهمية المظاهر الواضحة للعيان - لكني اقول اننا اصبحنا نؤدي طقوس بلا روح يعني بنصلي طقوس و بنصوم طقوس و بنتحجب طقوس و بنحج طقوس لكن فتش علي القلي تلاقيه مخوخ ، و الجميل في الموضوع ان حبايبك يقولوا ان المظهر يقود الي الجوهر ، يا حلاوة يا ولاد ! ده كده يبقي السعوديين و العياذ بالله هم اكثر
اهل الارض تدين .
انا لا انكر باي شكل اني شفت ناس تعز الاسلام بجد مش بهزار و من بره زي من جوه ، و اكتر منهم شفت اللي من بره هلا هلا و من جوه يعلم الله و انا لا اعمم لكن الفت النظر لشئ اصبح سائدا بنسبة 99% بس ، و انا لست متشائمة لكني اريد حلا و انا بأدعي اني حريصة علي صورة الاسلام واكثر من تجار الدين اللي احالوا حياتنا جحيم .
ممكن ناس فيكم تقول ان الفقر و الاستبداد و كذا مليون سبب يوصلونا للمرحلة دي ، بس مفيش حاجة تبرر اننا نخلي الدين لبانة في افواهنا و نبقي احط من كفار قريش . طيب تعرفوا حاجه حلوة قوي : ان خالد بن الوليد و عمر بن الخطاب كانوا كرماء و بينصروا المظلوم قبل ما يعتنقوا الاسلام ، يعني و هم كفار او مشركين يعني ! حلوة صح ، احنا بقي فين من الناس دي و هم كفار لاننا مش هنقدر عليهم بعد اعتناقهم للاسلام .
و في رمضان و ياعيني علي رمضان : الصلاة و التراويح علي عينهم و المصحف في كل الايادي ، و الشوارع مليانة زبالة و الناس بتزق بعضها في المواصلات ده غير انعدام التكافل الاجتماعي ، طيب الصلاة مهمة و الصوم مهم و القران مهم جدا بس ايه فايدة كل ده من غير السلوك ؟ و الناس اللي بتقرا القرأن بتدقق في اللي هي بتقرأه؟ علي ضمانتي ما بيحصلش الا بنسبة 5 % علي الاكثر ما هو لو كل واحد ماسك مصحف في ايده فهم اللي بيقراه نص فهم ماكنش ده بقي حالنا باي شكل .
و بعد كل ده ييجي تجار الدين و انا شخصيا نفسي اعمل فيهم زي ما عمل اتاتورك في المتشددين و الاصوليين في تركيا ، و كلامي ده لا يمنع وجود علماء دين قمة في الاحترام بجد الواحد يقعد بين ايديهم لنهاية الدهر ياخد من علمهم و علمهم مايخلصش بس للاسف دايما الناس المحترمة صوتها واطي .
المهم بقي انهي التدوينة دي بأعتراف خطير علشان بس تعرفوا انا بعزكم قد ايه : و انا صغيرة بس مش قوي يعني و انا في الصف الاول الاعدادي لما جاء رمضان لقيت كل صحابي لبنات الحلوين اول يوم في رمضان لابسين حجاب ! طيب ليه يا جماعة ؟ علشان حرام انك تصومي من غير حجاب ! ما علينا ، المهم انهم سألوني : ايه ده انتي مش هتلبسي حجاب ؟ قلتلهم لا لان مش كويس انكم تلبسوه في رمضان و تقلعوه بعد رمضان ، و المهم لقيتهم وجههم راح الوان و اتهموني بالكفر و قلة الادب و تكرر الامر في الصف الثاني الاعدادي و الجديد في الموضوع بقي ان ناس منهم قالولي : هو بمزاج اهلك ؟! و قالةلي انتي فاكرة نفسك ايه و انتي غلطانة و قليلة الادب و مش مؤمنة و مبتعرفيش ربنا !!!!!! علما ان البنات دول كانوا بلا ادني مبالغة او انتقام من حثالة المدرسة : مشاغبات قمة في السفالة مع المدرسين و سلوك مش محترم بره و جوه المدرسة من الاعدادي ، المهم انا يومها قلت لنفسي : منين بيتكلموا عن الحجاب و ربنا و منين بيعملوا كدهو بأي حق يرموني بميت حجر و هم كلهم خطايا . و من يومها اتخذت قرار ني معملش غير اللي انا مقتنعة بيه بعقلي اللي خلقهولي ربنا لان ربنا هو العقل مش السطحية و الغباء ، حتي لو عقلي و اقتناعي ده وصلني لشرب القهوة في محكمة تفتيش او عند احمد باشا لاظوغلي .
كفاية بقي اعترافات النهارده
و رمضان كريم .

انتحر و لا اتنحر ؟؟؟؟؟

اثناء متابعتي للاخبار في الفترة الاخيرة ما بين التحقيق مع الصحفي الجرئ ابراهيم عيسي ، و فوز عبد الله جول بالنتخابات الرئاسة في تركيا ، و بين بعض الانشطة اللي كنت مشغولة بيها و اللي هحكي لكم عليها بعدين ، لفت نظري خبر جميل و لطيف و الخبر ده اول ما عرفته عرفته من والدي - بابا يعني - و الخبر ده بيقول ان ايمن اسماعيل انتحر !!!!! البقاء لله بس مين ايمن اسماعيل ده ؟ ايمن اسماعيل ده لمن لا يعرف هو المتهم اثاني في قضية التوكيلات المزورة اللي فبركها النظام المصري للزعيم الليبرالي و رئيس حزب الغد ايمن نور علشان يخلص من الدوشه اللي عاملها و يبعده عن المنافسة علي اللي بالي بالكم !

و بالمناسبة ايمن اسماعيل ده له قصة لطيفة و دمها خفيف حكاها لي والدي بصفته عضو في هيئة الدفاع عن الدكتور ايمن او عمو ايمن ما تفرقش ، ان في ايام جلسات المحاكمة اللي كانت قبل الانتخابات لما كان محاميي المتهمين الاخرين بيدافعوا عن متهميهم عن طريق سب الدكتور ايمن و التشكيك في كل تاريخه من اول نسبه لحد عقد زواجه و في الجلسة الثانية لما تمكن فريق الدفاع اللي كان والدي من ضمنه تحويل ساحة المحكمة من سوق الثلاثاء لساحة محاكمة شبه محترمة و اجبار القاضي و محاميي الخصوم علي احترام الاجراءات القضائية حدث و صاح احد المتهمين في القضية و هو ايمن اسماعيل و قال انه هيغير كل اقواله اللي قالها في النيابة ، و ان ايمن نور برئ و انه مازورش التوكيلات و انها مدسوسة عليه من ................ (اكمل بكلمة مناسبة ) و انه تم اجباره علي الاعتراف علي ايمن نور بعد ما احتجز البوليس ولاد اخته و هدد بتعذيبهم .

حلو قوي ، بعد كده دخلنا في دوامة الانتخابات ثم الانقسام المدبر داخل الحزب ، ثم انتخابات مجلس الشعب اللي تم بعدها مباشرة الانهاء علي ايمن نور من خلال المسرحية الكوميدية اللي حصلت علي يد قاضي اسمه عادل عبد السلام جمعة بيتحقق معاه في قضية رشوة بالمناسبة . و بعد كده ياتي السؤال اللي بيجمع و بيطرح نفسه :اين ذهب ايمن اسماعيل ؟ ايمن اسماعيل يا جماعة تم وضعه في سجن الاستئناف في حين تردد ان باقي المتهمين في القضية لم يتم حبسهم ، و قاعدين بره السجن و الحالة تمام ، و الاخ ايمن اسماعيل بيعاني من اضطهاد المساجين له و سوء المعاملة داخل السجن بجانب الضرب و الاهانة و ده استمر لحد ما سمعنا انه انتحر !

انتحر !!!!!!!!!! طيب ليه ما يكونش اتنحر يعني اجبر علي الانتحار ، او اتقتل يعني حد اتسلط عليه في السجن و قتله .لان بصراحة كده الحكاية بقت غريبة قوي ، اشمعني ده بالذات ينتحر و دلوقتي يعني ماكانش يعرف ينتحر من زمان ثم تاتي الاشاعات لتقول انه مختل عقليا كالمعتاد و نفسويته مش مستقره ! فاكرين كام واحد مختل ظهر في الاخبار في الكام سنه الاخيرة .

و علي فكره الحادثة دي فكرتني بانتحار وزير الداخلية السوري غازي كنعان بعد ان اشارت التحقيقات التي قام بها القاضي الالماني ميليس الي تورطه في اغتيال رئيس الوزراء اللبناني رفيق لحريري حيث اشار البعض الي ان الوزير السوري لم ينتحر و انما نحر يعني قتل او اجبر علي الانتحار .

المهم :

دكتور ايمن :

انت وحشتنا قوي و وحشت مصر كلها و كل اللي بيدور علي الحرية و مش لاقيها و يا ريت تحافظ علي صحتك علشان لما تطلع من السجن نعرف نكمل كلنا المشوار و كل رمضان و انت طيب و يارب رمضان اللي جاي تكون بتحتفل بيه مع اسرتك .

توقيع :

لو بطلنا نحلم نموت .