تخيل الارجنتين . Imagine Argentina .

كالمعتاد يبدو اني مش هبطل هوايتي المحببة في الكسل و التقاعس عن اداء واجبي التدويني لكني اليوم اعود و قد انتهت حالة الاكتئاب السابقة و الحمد لله علشان اكلمكم عن حاجة حلوة قوي ، و بداية احب اسأل :حد فيكم شاف فيلم ( تخيل الارجنتين ) أو :IMAGINE ARGENTINA ?

عموما لو ما حدش شافه مش مشكلة و دلوقتي هتعرفوا ليه ، الفيلم ده واضح من اسمه انه بيتكلم عن الارجنتين و تحديدا في حقبة السبعينات اللطيفة و اللي ربنا غضب علية و درس امريكا اللاتينية زي حالاتي اكيد هيكون عارف ان حقبة السبعينات في الارجنتين و معظم دول امريكا اللاتينية كانت حقبة سوده و منيلة بنيلة لان الارجنتين لوحدها شهدت حوالي من 20 الف الي 50 الف حالة اختفاء قصري لمعارضين و صحفيين و و مثقفين علشان النظام الارجنتيني حس انهم - الكلاب بتوع المعارضة - عاملين له صداع !!!

الفيلم بتدور احداثة حول البطل ( انطونيو بانديراس ) و هو فنان معارض للنظام المستبد ، تتعرض زوجته ( ايما تومسون ) للاختطاف علي يد البوليس السياسي الارجنتيني و في رحلته للبحث عنها و استمرار معارضته للنظام الفاشي من خلال مسرحياته تتعرض ابنته ايضا للاختطاف و يتعرض هو للضرب المبرح .

المهم بقي انه في رحلة البحث عن زوجته بيلتقي بضحايا التعذيب او الاعتقال و اسر الضحايا و كل واحد بيسرد مأساته ، لحد ما في اخر الفيلم بيعرف يلاقي مراته اللي هربت من المعتقل ، و طول الفيلم تلاحظ - عزيزي المشاهد - مشاهد التعذيب اللطيفة و الاغتصاب المستمر و المنهجي للمعتقلين و خصوصا للزوجة و الابنة لدرجة ان الضابط بيجيب الام و بيجيب امامها العساكر و بيطلب منها اختيار الشخص اللي هيغتصب بنتها !!! شئ قمة في البشاعة و انتهاك ادمية الانسان و عدم مراعاة انسانية الشخص بالاساس .

المهم - عزيزي المشاهد - لو اعصابك ضعيفة بلاش تشوف الفيلم و لو اعصابك قوية حاول تمسكها و ما تنهرش .

و انا بفتكر احداث الفيلم البشع ( تخيل الارجنتين ) طرأ علي دماغي سؤال اكيد مجنون :الواد محمد اللي عنده 12 سنه ده يعني ما يعرفش العمي من السما عمل ايه عشان عمو الضابط يطلع عليه ابداعات الدراسة في كلية الشرطة مضاف ليها كام سنه خدمة في الداخلية مضاف اليهم عقد نفسية كامنة منذ الطفولة - زي ما قال عمو سيجموند فرويد - و يعذبه بكل قسوة و وحشية و يصعقة بالكهربا في اماكن حساسة في جسمه و كمان يحقق الانجاز الاكبر و يضربة باله حادة في صدرة لدرجة تؤدي لثقب في القفص الصدري ؟يا تري عمل ايه محمد الله يرحمة؟ مشي في الشارع حافي ؟ و لا راح المدرسة من غير ما يعمل الهوم ورك ؟عمل ايه محمد حد يعرف ؟حد يعرف ازاي قدر انسان يعمل كده في طفل ممكن يكون زي ابنه ؟قولولي ازاي لان انا ماعدش فيا عقل علشان افكر و انا حاسه ان كل العالم اتجنن من حولي .

ليه ده يحصل ؟ الله يخرب بيت حقوق الطفل و حقوق الانسان اللي قرفنا منها من كتر الكلام عنها و هي قافلة عنيها و ساده ودنها عن محمد اللي ممكن يكون اخويا او اخ او ابن اي حد فينا . مش ممكن الولد ده يكون عالم و ياخد نوبل او يكون رجل قانون شريف او دكتور مشهور او مهندس عبقري او حتي ضابط بوليس مش بيعذب الاطفال .

ثم نأتي للموضوع الاجمل :ايه رايكم يا جماعه بعد كل ده البلد دي ينقعد فيها ؟ تعالوا اقول لكم فكره حلوة قوي : ايه رايكم كلنا - يعني ال80 مليون - نسيب البلد و نطفش و ساعتها بقي البوليس مش هيلاقي حد يعذبه صح ؟؟؟

الي كل شعب مصر احب اقول اني النهارده حاسه بالعار لاني عايشه في بلد بيموت فيها الاطفال مش بس بالسرطان لا كمان بالتعذيب ، لا فعلا صدق اللي قال ان مصر دي حاله متفرده من نوعها و اللي دايما يتكلموا عن خسوسية الحالة المسرية !!!

اخص عليكي يا مصر ما كانش العشم تعملي كده فينا ، طيب الارجنتين جايز يكون ليها مبرر و ده مش مجاله دلوقتي بس انتي ليه تعملي فينا كده ؟

بس مصر ترد و تقول : الناس اللي عذبوا و بيعذبوا دول مش ولادي و رفضوا انهم حتي يعتبروا دمي دمهم و عزلوا نفسهم عني من زمان .........................

يا بنتي بلاش تكوني انتي و الزمن عليا دا انا شوفت كتير و مش سهل علي الام انها تشوف ولادها بيموتوا امام عنيها ......

انتي قلبك انفطر علي واحد بس ، طيب انا قلبي بينفطر كل يوم من 3286 سنه من يوم ما دخل الفرس مصر ، كل يوم قلبي بينحرق و انا كاتمة حزني جوا قلبي .

و تبكي مصر و اجن انا و اعود لاسألها : طيب يا مصر ليه ده بيحصل و ليه وصلنا للمرحلة القاسية دي ؟

فتجيب مصر و كان ليا مع مصر حديث طوييييييل تشوفوه الحلقة القادمة ان شاء الله و محدش اعتقلني بتهمة الفضفضة مع مصر ....

لكن لماذا اكتب ؟؟؟

بعد توقف فترة كبيرة الي حد ما بالنسبة لمدونة حديثة النشأة تحاول اثبات نفسها اعود اليكم بعد فترة اعتزال اعتقد انها كانت من اسعد فترات حياة الجميع ، و ذلك بعد ان قمت بعملية تقييم سريعة للموقف من اوله و من خلال ذلك اكتشفت عن نفسي و العالم حقائق كتير بس مش قوي .

فأولا :

اكتشفت اني مش بحب التكنولوجيا و انها بتتعب لي اعصابي مش عارفة ليه و خاصة الكمبيوتر اللي كل ماقعد عليه يجيلي اكتئاب و علي فكرة فيه فعلا اكتئاب مشهور جدا اسمه اكتئاب التكنولوجيا يعني انا مش بخرف ( حتي الان ) و الاكتئاب ده ارتبط بظهور الانترنت و فيلم العولمة .

و ثانيا :

اني لو كنت عملت المدونة دي علشان حسيت اني عندي حاجات كتيرة قوي عايزه اقولها و نفسي العالم كله يسمعني و كله يسمعني فمش عارفة ليه اول ما عملت المدونة مالقيتش اي حاجه بعد كده اقولها و كأن كلام الدنيا كلها خلص و شخصيا انا مش عارفة الناس اللي بتكتب تدوينة كل يوم دول ماشاء الله بيجيبوا كلام منين ؟؟؟

جايز تقولولي ان دي ناس حياتها مليانة و اني حياتي فاضية فلهؤلاء اقول : الف شكر انا حياتي فيها حاجات مش عظيمة قوي بس مازلت اعتقد اني عندي حاجات كتيرة تقال بما ان كل الناس بتتكلم .

ثالثا :

واضح من كوكتيل الالوان الرائع ده اني بأعاني من حالة ملل و اكتئاب فظيعة و شنيعة و مريعة و اني فاقدة الامل في الحياة و بصراحة انا فعلا فقدت الامل و بسأل نفسي عن جدوي اي شئ ممكن اعملة لاني بصراحة كده حصل موقف كده خلاني افقد الامل من حياتي و احس اني بنفخ في قربة مقطوعة .

رابعا :

يا تري يا هل تري كل حاجه نفسك تقولها هتعرف تقولها ؟ يا جماعة حرام عليكم دا احنا في مصر يعني لو نزلت الشارع بكره و لقيت الناس لابسه هدوم شتوي قمت قلتلهم احنا في الصيف فغالبا الناس ممكن تقطعك و تشويك رغم انك انت اللي صح و هم اللي غلط ، كما ان هناك سبب اخر جعلني اعيش حالة الاكتئاب دي الا و هي الاحداث الجارية في مصر ، بالله عليكم دي مش حاجه تخلي الواحد ينتحر مش يكتئب و بس . يعني مثلا من الاخبار اللطيفة اللي قرأت عنها موضوع الطفل المسكين اللي خلاه حظه المنيل يقع في يد ضباط من بتوع التعذيب و هم بقوا كتير قوي بصراحه و الضباط يقوموا مع الولد بالواجب و ده خلاني اتحسر علي ايام فيلم حياه او موت ! فاكرينه .؟؟؟؟؟ كما ان العلاقة بين المسلمين و المسيحيين في مصر وصلت لمرحلة خلتني مش قادرة اصدق ان في يوم من الايام اترفع علم في مظاهرة فيه هلال بيعانق صليب لكن التاريخ للاسف اكد لي ان ده حقيقة و ان الايام دي كانت موجودة و لما سألت التاريخ طب جت ازاي اننا كنا امة واحدة ثم اصبحنا زي الفراخ في عشه عمالين ننقر في بعضنا رد التاريخ وقال بحكمته المعهودة:

اصل وقتها كان رجال الدين اغلبهم عاقلين و محترمين مش زي ايامكم دي يا بنتي ، و كمان كان اللي بيحكم رجال القانون مش رجال الصاعقة ! يا بنتي ادي العيش لخبازه وهو يطلع تمام و كما قال المسيح (دع ما لله لله و ما لقيصر لقيصر ) . المهم يا عم التاريخ قيصر يطلع منها و هي تعمر .

خامسا :

انا بعتذر لكل اللي نرفذهم كلام المرة اللي فاتت اني مش هكره ضباط الشرطة حتي لو سجنوني و عذبوني و اقول لهم ان ضباط الشرطة اللطاف المهذبين دول رموا واحد في العمرانية من البلكونة و قتلوا طفل عنده 12 سنه في شها و حرقوا بدوي في سيوة ده غير اللي عملوه و بيعملوه يعني من الاخر الفاتورة بقت تقيلة قوي مع الشعب و اصبحت فكرة التنازل غير واردة اساسا لكني اعود و اقول :

i see the puppet , where is the puppeteer ???

سادسا :

الفكرة هي اننا بننفجر للخارج احسن ما ننفجر للداخل و انا بصراحة حاسه اني عايزه انفجر و عندي احساس ان مصر كلها عايزة تنفجر زيي بالضبط بس انا لو انفجرت كبيري اصرخ شوية و بعد كدة اترزع في مكاني ،

انما مصر لو انفجرت اعتقد ان الصورة هتكون ابشع بكتير .

عزيزتي مصر :

اتمني ان تريحي رأسك المجهد علي كتفي و تنفجري في البكاء حتي تغسلي همومك و تهمسي لي ،و تقوليلي بكل صراحة :

مين فيكي اللي بيبيع الضمير ، و يشتري بيه الدمار ؟؟؟؟؟

اللي قاعد في المسجد اواللي قاعد في الكنيسة ؟

اللي قاعد في قسم البوليس ؟

اللي بيدرس في المدرسة ؟

اللي في المستشفي او في الكلية ؟

الطالب اللي في المدرسة او اللي في الجامعة ؟

الراجل اللي ماشي في الشارع ؟

ولا اللي قاعد فوق دماغنا ؟

لكن مصر لا تجيب و لم تجيب و لن تجيب ، عارفين ليه ؟؟؟؟؟

علشان مصر رمت نفسها في النيل من بعد ما مات ابسماتيك الثالث .

عزيزتي الفتاه كيف تقين نفسك خطر التحرش .

لأ لأ لأ متفتكروش ان الموضوع للكبار فقط و لا حاجة لا الموضوع مناسب لكل الاعمار بشرط عدم وجود فئة واحدة من ضمن القراء ،الفئة دي اكيد هتعرفوها من خلال التدوينة و بالمناسبة فكرة التدوينة بتاعة النهاردة موجودة في دماغي من وقت احداث 25 مايو 2005 ثم تبلورت بعد احداث وسط البلد .
الفكرة دي هي خلاصة بتاع شهر كانت كل القنوات بتتكلم عن ظاهرة ازدياد معدل التحرش بالفتيات و النساء من كل الاعمار و كان التركيز الاساسي هو كيف تتصرف المرأة او الفتاة لو حاجة زي دي حصلت لا قدر الله ، و رغم اني عندي كلام كتير يقال في هذا الموضوع الا اني سأكتفي بنقطة صغيرة عبارة عن بنبونايه اقدمها لكل فتاة .
عزيزتي الفتاة المصرية :
لو تصادف ان انتي اثناء سيرك في الشارع لاحظتي ان فيه حد بيحاول يتحرش بيكي او متابعك او حد شكله مريب و بيتابعك بطريقة مش طبيعية فاول و اكثر الحلول امانا انك تدوري علي اقرب عربية بوليس متوقفة و ما شاء الله ما اكترهم في الشوارع و تقولي لعمو الضابط الرخم غالبا و المتغطرس في اغلب الاحوال ان فيه حدبيحاول يتحرش بيكي مع رسم علامات الرعب و الفزع علي ملامحك ده لو ما كنتيش مرعوبة كفاية علشان يتحرك و صدقيني يا عزيزتي ففي اغلب الاحوال سيخاف المتحرش و يمشي ده لو ما كبرتش في دماغ الضابط و قرر (يعلق ) المتحرش .
ايه ده معني كده ان عمو الضابط اللي واقف في الشارع ممكن يكون و الله اعلم سببا في ردع المتحرش او القبض عليه ؟ طبعا لكن الا في حالة واحدة الا وهي انك عزيزتي الفتاه تكوني من البنات اياهم بتوع المظاهرات و تسقط الحكومة و كفاية و الكلام الوحش ده و ساعتها يا حلوة ولا حد هيعبرك بل ممكن تشوفي في الشارع او قسم البوليس مالا ترينه في الشارع و يا سلام بقي عزيزتي الفتاه لو انتي من البنات الخطرين اللي متعودين يعملوا اعتصامات في نقابة الصحفيين ، يبقي تقولي علي نفسك يا رحمن يا رحيم .
يعني من الاخر كده و الخلاصة عزيزتي الفتاه انا عايزة اوصل ان من اهم طرق الوقاية من التحرش و خاصة في اوقات المظاهرات و الاستفتاءات و تمديد قانون الطوارئ و الاعتصامات و خلافة انك تكوني بعيدة بمسافة لا تقل عن 20 كيلو متر عن المنطقة بتاعة الناس المعارضين الوحشين علشان متتعرضيش لتحرش في الشارع او في ضيافة احمد باشا لاظوغلي سيان .
طيب اقول لكم حاجة حلوة قوي :
فاكرين ضابط شرطة شاب كان علي وش جواز استشهد و هو بينقذ فتاة من الاغتصاب و مات و البنت رجعت سليمة و الحمد لله و يرحم الله الضابط الشهم ، طيب لما الحكاية هي ان الناس دول الضباط يعني و بتوع البوليس هم اللي بيحمونا و لو حصل لنا حاجه في الشارع دول اول ناس نستغيث بيهم ؟
ايه اللي وصلنا لمرحلة الضباط اللي بيتحرشوا و بيغتصبوا الستات و الرجالة كمان في اقسام البوليس ؟ ليه وصلنا لمرحلة ان الضباط مش بس بيقتحموا البيوت بالليل لا كمان بيرموا الناس من البلكونات . معلش اصلي هتجنن خلاص كل ما ابص في المصري اليوم او الدستور او الفجر او صوت الامة اكتشف حالات تعذيب و قتل جديدة و خاصة في الشهر الاخير .
اعزائي ضباط الشرطة و المرور و امن الدولة :
انا مش بكرهكم حتي لو انتم ما حبتوناش احنا يعني الشعب اللي ماشي جنب الحيط او اللي ماشي في المظاهرات و مش هكرهكم حتي لو حبستوني و عذبتوني ، عارفين ليه ؟ عشان ده مش وضع طبيعي و ان الوضع الطبيعي ان احنا ننام في امان بالليل و نمشي بأمان في النهار مش نسهر بالليل نقول مين اللي عليه الدور و من الدور الكام .
اعزائي ضباط الشرطي حاميي حمي الوطن :
اتمني ان اري ضباط الشرطة اللي قلبوا القاهرة كلها يدوروا علي بنت صغيرة اخدت دوا غلط لابوها علشان ينقذوا الاب و علشان ينقذوه عملوا اعلان في الاذاعة و اتمني اني اعيش و اشوف ضباط البوليس اللي ماتوا و هم بيدافعوا عن قسم بوليس الاسماعيلية و مات منهم اللي مات و اتصاب اللي اتصاب و كسبوا احترام عدوهم اللي ضربهم بالمدافع و بعد كده ضرب لهم التحية العسكرية.
بس عشان كل ده يحصل لازم يبقي عندنا وزير داخلية اسمه فؤاد سراج الدين .
صح و لا غلط .؟؟؟؟؟؟

كان يوم ابيض و لامؤاخذة .

طبعا معظمكم سأل هي البت اللي كانت عاملة المدونة دي راحت فين ولا هي عملت العاملة و هربت ولا ايه ؟ انما والله لو تعرفوا المقلب اللي انا كنت بشربه ممكن تفكروا تبعتولي تبرعات مدرسين و خبراء حاسب الي.
طبعا مدونتي اسمها اعترافات ليبرالية و شكل كده اسمها هيتغير يبقي اعترافات غبية او حاجه كده يعني . الفكرة اني بعد ما عملت المدونة و تعبت فيها و بعتلكم الرسالة حاولت ادخل علي المدونة و كان الخبر السعيد ان الموقع تعامل معايا علي انه ميعرفنيش ازاي معرفش !!!!! و قاللي لازم تسجيل و حاجات غريبة كده ، قلت اسجل و بعدين لقيت نفسي بمر بمراحل انشاء المدونة تاني فقمت باختيار اسم المدونة للمرة الثانية و وصلنا للعنوان الانجليزي فطبعا اخترت ترجمة العنوان العربي اللي انا اخترته المرة الاولي و كان الخبر السعيد ان فيه مدونة بالاسم ده ! بتاعتي طبعا اللي انا مش عارفه افتحها .
طبعا بعد ما اخذت دواء الضغط قلت امري لله طالما قليت عقلي و قررت اعمل مدونة و علي هذا الاساس اخترت العنوان الانجليزي : liberal confession .
يعني حذفت الاس الاخيرة و علي هذا الاساس تم انشاء المدونة و الحمد لله بعد ما دمي اتحرق .
المهم طبعا رسالة الترحيب وصلت لكم و علشان كده مش هكتب رسالة ترحيب تاني و هتبقي المدونة دي هي مدونتي اللي هقرفكم بيها ان شاء الله .
شكرا مليون مره للي عبروني و رحبوا بانضمامي لعالم التدوين :سناء و شذي و اماني و bedouin .
و ربنا يقدرني و اكون عند حسن ظن الجميع و انتظروا مني البيان التالي قريبا وبس و قبل ان نبدا : اوعدوني انكم تستحملوا كلامي و وقت ما يعجبكوش الكلام بأي شكل ممكن تعلقوا عليه او تحذفوا اي رسالة فيها المدونة بس نفضل اصحاب لان اختلاف الرأي لا يفسد للود قضية .
يلا بقي كفاية رغي .سلام و الي البيان التالي .