بابل

تعرفوا بابل ؟؟؟؟؟؟؟؟؟؟؟؟؟؟

طيب تعرفوا ايه حكاية بابل ؟؟؟؟؟ بابل دي حكايتها حكاية لطيفة كده من العهد القديم تصلح للقراءة قبل النوم علشان الحكاية تبقي كوابيس .

يحكي في اسطورة بابل ان بابل دي كانت اجمل عواصم الارض و كانت مركز ثقافي و تجاري هام و كانت عاصمة اقوي دولة في العالم وقتها ، و كانت كل شعوب الارض تقصد بابل لما حققته من تقدم و رقي و رقي .

كانت بابل تتمتع بميزة هامة الا وهي ان كل واحد فيها كان بيتكلم بلغة بلاده اللي جاء منها و ده جعل بابل فيها لغات كتير مختلفة بس كان الكل فاهمين بعض رغم اختلاف اللغات و كانت دي اهم مميزات بابل : ان الكل فاهمين بعض رغم اختلاف اللسان و الكل متوافق و الكل سعيد ...

حتي جاء اليوم الاسود ............................

ملك بابل كان عايز يوصل لربنا في السما علشان يشوفه و علشان يحقق الرغبة دي عمل فكرة عبقرية قوي : قرر يبني برج كبييييييييييييييير و طوييييييل علشان يوصل السما و يعرف يشوف ربنا ، و يقال في رواية للاسطورة ان البرج ده كان من اجساد العبيد ، يعني الملك عمل برج من اجساد العبيد علشان يوصل السما و يشوف ربنا وواضح ان كان عنده عبيد كتير .

بعد كده بقي ايه اللي حصل ؟؟؟؟

ربنا غضب علي بابل غضب شديد جدا ..... و لعنها .......

عارفين ايه كانت لعنة بابل : ان المدينة دي ماحدش فيها يعرف يفهم التاني ، يعني بعد ما كان كل الناس بتفهم بعض رغم اختلاف الالسنة ماعدش حد عارف يفهم حد حتي اللي يتكلموا نفس اللسان و دي كانتا حكاية المدينة الملعونة بابل اعزائي المشاهدين .

طيب تعالوا اقول لكم حاجة حلوة قوي : الحكاية دي مش بتفكركم بحاجة ؟ بلاش ، طيب تفتكروا اننا حاليا عايشين في لعنة بابل ؟ ان محدش عارف يفهم حد في مصر رغم اننا بنتكلم بنفس اللسان و لينا نفس اللغة ، يعني كده من الاخر ان مصر تحولت الي بابل المدينة الاسطورية مع فارق بسيط اننا لم نعد منارة العالم .

ايها الشعب : جائنا البيان التالي : مصر بقت بابل .. نكتة قديمة ، صح ؟

طيب خلونا نتكلم عن نفسنا شوية : احنا ليه حصلنا و بكل فخر علي لقب سكان بابل ، يعني ليه ماعدناش فاهمين بعض ،

تفتكروا ان ربنا لعنا زي ما لعن بابل ؟

طيب لية ربنا لعننا ؟ اكيد عملنا حاجه غلط لا و اكيد غلط كبير كمان ، و لو عايزيين تعرفوا ايه هو خليني اسألكم سؤال :

فكرت مره في شعور ورده بتقطفها ؟ فكرت انها ممكن تكون بتصرخ لانك بتنزع حياتها لا و بعد كده تتضايق / تتضايقي لو الورده شوكها جرح ايدك .

فكرت \ي مره ان الكلمة اللي هتطلع منك ممكن مهما كانت سهولتها تجرح انسان ؟

اساسا تعرف معني جرح انسان ؟ معني انك تدخل في قلبه خنجر و تخرجه بكل يساطه علشان تدخله في مكان تاني ؟

فكرت : اكيد طبعا لا .

طيب فكرت و انت بتضرب حيوان ايه هيكون شعورك لو انت نفسك كنت حيوان و انضربت ؟ اكيد طبعا لا .

بلاش كلام عن الحيوانات لاننا متفقين من التدوينة السايقة اننا بندخل قلوب بعض بالسكاكين فمن المتوقع اننا مش هنحس بالحيوانات لاننا اساسا مش بنحس بالبني ادمين .

بس دي مش سفسطة لان الحاجات الصغيرة الغريبة دي هي اللي بتخلينا بشر .

اعزائي المشاهدين : ازف لكم الخبر السعيد : احنا مش محتاجين نعيش في بابل لان بابل معششه جوانا و لعنتها داخل كل واحد فينا و مش هتروح ........

الا ..........

لو سامحتك الوردة اللي قتلتها ..................

طعم المرارة !

هل ؟؟؟؟

جربت مرة كده يعني عزيزي المشاهد الاحساس بالمرارة ؟

جربت مرة كده تحس انك كاره نفسك و كاره الحياه باللي فيها ؟ طيب لو كنت جربت ، ايه رايك في الاحساس ده ، طيب لو جربته كانت ايه هي المناسبة السعيدة التي جعلتك عزيزي المشاهد تشعر بالاحساس الرائع !! ده ؟

انا - شخصيا - حسيت بطعم المرارة السنه دي كتير قوي ، فمثلا - و من غير شخرية - كنت كل ما اشوف مسلسل الملك فاروق في رمضان كنت بحس بطعم مرارة غريب بعد المسلسل ، تقولوش ان اللي كانوا في المسلسل كانوا من بقية اهلي ، بس برضة احساس المرارة ما كانش بيروح و مازال ملازمني حتي و انا بتفرج علي المسلسل تاني دلوقتي .

و في ظرف تاني بحس بطعم مرارة رهيب و فظيع و مش بقدر استحمله لما بتابع الاخبار و خصوصا اخبار لبنان و محدش يسأل ليه ، لا و الكوميدي في الموضوع هو اني مطلوب مني اتابع اخبار لبنان بشكل خاص علشان الدراسة .

و من المناسبات اللي بتخليني احس بطعم المرارة ال .. عبقري لما اقرأ شعر و خصوصا لو لحد من الاحباء بتوع المهجر او الرومانسية الجديدة او الشعر الحر و خصوصا مجمود درويش او نزار قباني او امل دنقل او صلاح عبد الصبور او او او ناس كتير يعني ، بس الفكرة ان الواحد بيقرأ الشعر علشان يحس بالبهجة ، بس من الواضح ان احساسي بالبهجة غريب شوية .

و طبعا من اهم الاسباب اللي بتخليني بجد كارهه حياتي : كل حاجه بتحصل من حوليا من اول ما بنزل الشارع لحد ما برجع في نهاية اليوم ، بس انا بفترض ان ده امر معروف للجميع بل و مشترك مع ناس كتير .

بس هل يا تري ده شعور صحي انك تشعر بالمرارة ؟ يعني من الطبيعي انك مطرح ما تتحرك تحس بطعم الصبار في فمك ؟ و الله انا شخصيا مش عارفة ، بس ان الواحد يحس باللي حوالية ده شئ جميل بس من المؤكد ان اللي يزيد عن جده ينقلب ضده ، و ده بيختلف عن نظرية العبقري نزار قباني بأن الدمع هو الانسان و ان انسان بلا حزن هو بقايا انسان ، ما علينا برضه .

اعرف ناس عبقرية قوي مش بتحس بالمرارة خالص بس بتعرف ترسم الاحساس بالمرارة علشان تقنع ناس تانية ان عندهم احساس و لو قابلتم حد من دول ياريت تخلصوني منهم لانهم عبئ علي الاحساس الانساني .

و من النظريات اللطيفة اللي بتفسر موضوع المرارة ده هو ان التقدم التكنولوجي وثورة المعلومات اوجدت نمط هو ( انسان الحداثة ) و اللي هو غالبا بائس لانه محاصر بكم كبير من المعلومات و الخبرات اللي جايز ما يكونش قادر يوظفها و في نفس الوقت هو بيحس بالوحدة بسبب الظروف القاسية اللي خلت كل واحد منشغل بعمله وبحياته الخاصة عن التواصل مع الاخرين ، اي ان التقدم التكنولوجي و قلة التواصل الانساني من مسببات المرارة اللي جايز يكون اسمها العلمي : الاكتئاب رغم اني مش مقتنعة قوي بان المرارة هي الاكتئاب .

ايه بقي خلاصة الكلام الفاضي ده ؟؟؟؟؟

احنا ايه اللي بيشغلنا عن بعض بالضبط ؟ جايز الحياه صعبة و لا تطاق و مستحيلة و كل حاجة ، بس ايه اللي بيخلينا بعيدين عن الاخرين : هو احنا عندنا مزاج نحبس نفسنا و بعد كده نشتكي من العزلة ؟ لا و حاجة تانية لطيفة بقي ، هو ان اللي بيقل عقلة و يتواصل مع الاخرين ، التواصل بتاعه ده بييجي علي دماغ البني ادمين التانيين ، و كاننا زي ماقال الشاعر الالماني ( ريلكه ) و هو بيوصف حالة الانسان في المستقبل : ان الناس هتكون قلوبهم مقفولة و اللي هيحاول يفتح قلب حد هيفتحة بسكين !! و طبعا المعني واضح .

يعني خلاص احنا معدناش فاهمين بعض و بقينا مغلقين و مشفرين امام بعضنا ؟

الحمد لله ......

و نلتقي في التدوينة القادمة لاستكمال حديثنا العبثي .

و كلمة اخيرة :

يا هل مدينتنا ...

انفجروا او موتوا ....

رعب اكبر سوف يجئ ....

( من قصيدة لصلاح عبد الصبور )

لكن تاني ..................

انا كنت بقول انكم تكنسلوا المدونة و تريحوني لأني واضح اني منحوسه بزيادة و لما تعرفوا ان التدوينة اللي تسبق دي و اللي المفروض انها ظهرت علي المدونة انها انكتبت النهارده مكونة من كلمة واحدة و ان الجهاز نزلها بس عشان يعند معايا .
المهم بقي احنا كنا بنقول لكن ...........................
لماذا لا يتظاهر الليبراليين ؟؟؟؟؟؟؟؟؟؟؟؟؟؟؟؟؟؟؟؟؟
يعني ليه احنا الليبراليين مشض بنخرج في مظاهرات زي اخواننا اليساريين او الاخوان المسلمين اللي زلونا اننا بعنا القضية و مش بنعرف
نناضل ، و بصراحة السؤال ده بيؤرقني - بس مش قوي - من وقت تدريب حقوق الانسان لما اصدقائنا اليساريين بهدلونا و عايرونا باننا بنخاف ننزل الشارع !!!!
لكن بجد ليه الليبراليين مش بيطلعوا في المظاهرات اللي دايما بيتصدرها الاخوان و اليسار و ينضربوا فيها ، و كذلك معظم حركات الاحتجاج يسارية و الاخوان مشتركين معاهم ، ده حتي الاتحاد اللي كان حر كان المحرك الاساسي له الاخوان و اليسار ؟ يعني هو
الليبراليين بطلوا يطلعوا في مظاهرات من بعد المرحوم سعد باشا زغلول ؟؟؟ يعني احنا بعنا القضية بجد ؟ يا لهوي ؟؟؟ اخص علينا و علي ندالتنا اننا بعنا القضية.
بس ممكن سؤال وجيه : هي فين القضية بالضبط .؟؟؟؟
ايوه : هي ايه القضية اللي احنا بعناها و هي ايه القضية اساسا : و ده بيقودنا للسؤال المهم : هي ايه قضية اخواننا المناضلين بتوع المظاهرات ؟
اولا :
المظاهرات بتاعة تعديل الدستور و انتخابات الرئاسة و معظم المظاهرات التي قامت فيما يتعلق بقضايا تخص مصر طلع فيها ليبراليين من حزب الغد و ليبراليين مستقليين و عملوا احلي شغل بس الوفد مبيوافقش علي خروج اعضاءة في مظاهرات الحزب بينظمها علشان دي
استراتيجية معينة بترفض التظاهر في الوقت الحالي ، و دي سياسه الحزب و هو حر فيها ، لكن غير كده حصل و حصلنا زي ما حصل
لاخواننا المناضلين و اتوضبنا ...
لكن مرة ثالثة بقي : ايه اللي بيخلي اليسار او الاخوان يطلعوا في مظاهرات؟ و هي دي ثانيا :
اخواننا اليساريين بيدافعوا عن طبقات الشعب المطحونة و بيحبوا قوي المظاهرات اللي هي ضد الغلاء و ارتفاع الاسعار و دايما بيطالبوا بخفض الاسعار ، و قضيتهم الاساسية خفض الشلن بتاع رغيف العيش و وضع دعم علي كل حاجه في الحياة ، بس انا عمري ما شوفت مظاهرة يسارية علشان زيادة الاجور مثلا او علشان رفع الدخل ، او زيادة الاستثمار اللي هيؤدي رفع قيمة العملة و ده بالتالي هيؤدي لخفض الاسعار بل و زيادة مستوي معيشة الانسان المصري ، و واضح اننا كتير بننسي ان معظم اسباب ارتفاع الاسعار نابعة عن التضخم و انخفاض قيمة العملة و ده الحل الوحيد معاه : اي حاجه في الدنيا غير دعم كل السلع الاساسية اللي عايزة اخواننا اليساريين .
محدش يفتكرني يا جماعة اني من الناس البطالة اللي بياكلوا رغيف العيش الفرنساوي ابو 7 جنية او اعرف لا سمح الله يعني ايه سيمومن فيميه ، لكني مواطنة مصرية متنيلة بسبب الغلاء زي كل الناس بس بحتفظ لنفسي بحق النقد .
طيب دي ممكن تكون ايديولوجيتهم و كل واحد حر في ايديولوجيته بس دي بكل حال مختلفة عن التصور الليبرالي للموضوع و اللي هنتكلم عنه في وقت لاحق ، بس طالما ان المسألة ايديولوجية بحته : ليه دايما بيزعلوا مننا اننا مش بنشارك في مثل هذه المظاهرات ؟
ثالثا : الاخوان بقي :
معظم الشغل بتاع الاخوان اللي بيظهر في النقابات زي نقابة الاطباء و برضه شغل بعض التيارات اليسارية العروبية بيركزوا علي الاعتراض علي اللي بيحصل في فلسطين و العراق و دارفور ، و ده حلو قوي و مفيهوش مشكلة ، و ساعات برضة شارك فيه ليبراليين مستقليين او غد او افراد من الوفد ، بس احنا بنسي قضية اساسية الا و هي ان الليبراليين المصريين معظمهم بينتموا لمدرسة الحقبة الليبرالية اللي رفعت شعار القومية المصرية و مصر اولا ، و ان مصر هي اهم حاجه عندنا في الحياه و هي فعلا اغلي حاجه في الحياه و علي هذا الليبراليين بيبقوا مش متحمسين قوي لمثل هذه المظاهرات و ان لم يخلو الموضوع من بعض المزايدات من الليبراليين علشان تواجدهم في الشارع لان الراي العام بيحب مثل هذه القضايا اللي بتحب الحكومة ترميها للشعب علشان يعمل دماغ بيها و يطنش علي البلاوي اللي بتحصل و بتتجاوز الدعم ، يعني مش يبقي في مصر بلاوي سرطان اطفال و اعلي نسب فشل كلوي و التهاب كبدي وبائي في العالم و قلعة الكبش و رغيف عيش بسبعة جنية - ولا تزعلوا - و اللي يدور يلاقي و بعد كل ده نقطع من لحمنا الحي و قوت ولادنا علشان فلسطين و العراق و دول الخليج بتصرف مليارات علي اللانجيري و التفاح الامريكاني و برضه هم عرب زينا ، اشمعني احنا اللي بندفع الفاتورة من ايام ثورة الجزائر و حرب اليمن و المقاطعة العربية ؟و احنا عندنا بلاوي نصدرها و اللي عايز ياخد و البلوي بتعريفة للبيع .
رابعا :
نيجي لحاجه لطيفة قوي الا و هي : ان الفكر الاشتراكي الكلاسيكي اللي بيعتنقة اليساريين المصريين ، عنده حساسية و هرش من النظام الرأسمالي حتي لو هيكون كويس لاقصي حد و بجد مش بهزار ان يساريين كتير بيعتبروا ان الليبراليين الراسماليين دول مبشريين للهيمنة الراسمالية الغربية و لازم نتصدي لهؤلاء العملاء ، و الاخوان المسلمين اساسا مش بيحبوا يشتغلوا مع حد ومش بيحبوا يساندوا حد غير نفسهم و عندهم قدر كبير من الجمود الايديولوجي اللي بيرفض قبول الايديولوجياتالاخري ، و لو اليساريين مش بيحبوا التفاوض في المبادئ لتحقيق مصالح الا انهم لا يقارنوا بالاخوان .
طيب ................ ايه اللي جمع الشامي علي المغربي ؟ ان التحالف بين اليسار و اليمين كان صعب و غير متاح و الاخوان منتشرين في الشارع و اليساريين بيحبوا ينزلوا الشارع و م ثم وجدنا ظاهرة ان الاخوان و اليساريين بينظموا مظاهرات مع بعض ، لكن شهر العسل هذا لم يستمر و سرعان ما اتخانق الاثنين و كان هذا واضحا في الاتحاد الحر بتاع السنه اللي فاتت . و الليبراليين يا عيني اللي خلص عليهم عبد الناصر بالاشتراكية و السادات بالتيارات الاسلامية و تم القضاءعلي اي تواجد لهم في الشارع ، حتي لو حاولوا ينزلوا الشارع اللي مسيطر عليه الاخوان و اليسار ، فهم غير مرحب بهم علي الاطلاق ، و كل مدي و الحركة الليبرالية بتضعف و تتشتت و تبعد و ان ظهرت
محاولات فردية فاولا و اخيرا بشعبية منخفضة جدا و بقدر كبير من المزايدات السياسية و الاعتماد علي قضايا ضد فكر الليبراليين بالاساس مما لا يحسن الامر بل - و لامؤاخذة - بيطينة اكتر و اكتر .
اصدقائي :
انا مش بشتم في حد او بذم في حد ، لان كل واحد بيحب مصر علي طريقته بس احنا كلنا غلطنا في مصر و حطينا اولويات اخري عنها و النتيجة اننا غلطنا في بعضنا و في مصر و في نفسنا و الاجيال المستقبلية اللي ممكن تلعنا لو عرفت الي عملناه في نفسنا و في البلد .
يا ريت محدش يزعل مني و تذكروا جميعا ان دي وجهة نظر و حق الرد مكفول و ان اللي مش بيحب كلامي له مطلق الحق في حذف رسالة المدونة لما توصله .
اشوفكم علي خير


كلمة اخيرة :
امصيري انا امشي ........
وغدي امس .................
و احباء و قيود ؟؟؟؟؟؟؟؟؟
( من اغنية للرائعة ماجدة الرومي ) .

لكن............

مع الحسين .

" كنت في كربلاء ...

قال لي الشيخ : ان الحسين

مات من اجل جرعة ماء "

عندما قرأت هذه الكلمات التي كتبها الشاعر العبقري امل دنقل في قصيدة :( من اوراق ابو نواس ) اول ما شعرت به هو الذل ! فعندما يموت حفيد رسول الله صلي الله عليه وسلم من اجل جرعة ماء - حتي لو حدث ذلك في قصيدة - فذلك عار علينا جميعا كمسلمين .

لكن لو تحدثنا عن عارنا كمسلمين ، فاعتقد انه سيتجاوز كثيرا موت الحسين من اجل جرعة ماء .

"و تساءلت كيف السيوف استباحت بني الاكرمين ........

فأجاب الذي بصرته السماء .......

انه الذهب المتلألئ في كل عين "

صدقت ايها الشاعر ، فالذهب المتلالئ في كل عين جعل الخليفة ( المسلم ) يزيد بن معاوية بن ابي سفيان يطلق جيوشه علي الامام الحسين حفيد الرسول صلي الله عليه و سلم و ابن الامام علي بن ابي طالب و ابن السيدة فاطمة الزهراء ابنة الرسول ، و ليت الامر يتوقف علي القتل بل يتعدي ذلك للتمثيل بجثة الامام كي يكون عبره لمن يعتبر .

و نلاحظ اعزائي المشاهدين ان الخليفة السابق معاوية بن ابي سفيان ( سيدنا معاوية ) كان ، قد قتل الامام الحسن بالسم وقت ان كان خليفة و ذلك كي لا يظهر من المسلمين من يقول ان الحسن هو الاحق بالخلافة ، رغم ان الحسن كان قد تنازل عن الخلافة لمعاوية بن ابي سفيان ، يعني الحسن كان مش عايزها لكن هذا ما تفعلة السياسة .

و من غير رخامة ، اكيد فيه ناس كتير تعرف ان اول ناس اقنعوا الحسين بالثورة و في نفس الوقت اول ناس تخلوا عنه هم الاعزاء الاحباء اهل العراق الشقيق ، يعني اللي باعوا الحسين و ابو الحسين اكيد اكيد اكيد يبيعوا صدام حسين و ابو مصعب الزرقاوي و لو قعد بوش في العراق اكيد برضه هيبيعوه .

" ان تكن كلمات الحسين ....

و سيوف الحسين ......

و جلال الحسين ......

سقطت دون ان تنقذ الحق من ذهب الامراء ...

افتقدر ان تنقذ الحق ثرثرة الشعراء ؟؟؟؟"

يعني من الاخر كده مفيش فايدة يا صفية ، و غطيني و صوتي !!!!! الراجل جاب الحكاية من الاخر ، اذا كان الحسين بكل جلاله و نسبه الشريف اندبح و سقط تحت نصال السيوف و سنابك الخيول ، فايه اللي يخلي لكلامنا قيمة او لازمة او اهمية ؟ طيب و اللي يتكلم يا حلوين ؟ اعرف شوية ناس صدقوا نفسهم و اتكلموا و اعتقد ان انتم ممكن تكونوا عارفين النتيجة ايه .

و ده بيقودنا لفكرة عبثية تانيه : ياتري ده قدر مين بالضبط : قدرنا نموت الحسين و نقعد نعيط عليه و لا قدر الحسين انه يحارب لوحده و يتقتل من غير ما حد يساعده او يسانده ؟

كنت في كربلاء .....

و ياريتني ما كنت في كربلاء

يا ريتني ماكنت في كربلاء علشان ماشوفش الحق بيتوزن مع الدهب و كفة الذهب بترجح .

يا ريتني ماكنت في كربلاء علشان ما اشوفش الشرف و الحق بيضيع ، جايز لو ما كنتش شوفت كان بقي عندي امل في الحياه ، لكن مين يقدر يرجع الزمن ؟؟؟

و اخيرا و ليس اخرا : فزورة 15 رمضان :

عزيزي المواطن :

تخيل انك بتشتغل في مصنع و بتأخد في الشهر 200 جنيه بحالهم ، و حضرتك متجوز و عندك عيال و عايز تاكل و تودي العيال المدرسة و تديهم دروس او حتي مجموعات تقوية ، و كمان تدفع فواتير مياه و كهرباء و تليفون ، و بعد كل ده المصنع اللي انت بتشتغل فيه ياريته بيخسر ، لا ده بيكسب و بيكسب كويس قوي كمان و الادارة مش موافقة توزع الارباح و بتقول ان المصنع بيخسر ، علما ان مرتب مدير المصنع بيعمل شئ و شويات في الشهر . ماذا تفعل عزيزي المواطن لو ما عملتش اضراب انت و الكام 27000 عامل اللي شغالين معاك و بيعيشوا نفس الظروف ؟؟؟؟؟؟

ترسل الاجابات يوم 17 رمضان الي وزارة الاستثمار و الي جريدة الاهرام و الاخبار و الجمهورية و المصري اليوم و الدستور و الوفد و بلاش الغد علشان محدش يقول اني قلتلكم علي حاجه ،و لو حل الفزورة ما ظهرش يوم 20 رمضان ممكن تاخدوا الطريق الاسهل و تبعتوا لربنا في ليلة القدر و ده يكون احسن .

حل الفزورة في التدوينة الجاية ،

و نلتقي بعد الفاصل .

ارني الله

في البداية كل سنه و حضراتكم طيبين بمناسبة شهر رمضان المبارك - و ياريت محدش يفهمني غلط علشان مبارك دي - رغم ان التهنئة بالشهر الكريم دي جت متأخرة شويتين ، بس خلينا في المهم اللي انا شخصيا شايفة انه مناسب جدا للايام الجميلة اللي احنا عايشينها دي .
بداية اعزائي المشاهدين احب اسألكم : انتم شايفين ان احنا في مصر نعرف ربنا باي شكل و من قريب او من بعيد ؟ كل واحد حر في اجابته و طبعا انا كمان عندي اجابتي اللي اتمني انها ما تكونش صادمة ليكم في الايام المفترجة دي ، و هي اننا يا مصريين شعب ما يعرفش ربنا !!!!!!!!
ايه ، اتصدمتم ؟ طيب بلاش قلة ادب ، معظمنا ميعرفش ربنا ، ايه كده كويس ؟؟؟
طيب قبل ما تزعلوا مني و تحلفوا ما تعرفوني تاني استنوا شوية اقول لكم ايه : كل الناس بتصوم و بتصلي و بتتكلم في ربنا ، بس مين في دول بيراعي ربنا في تصرفاته او شغله او معاملاته مع اللي حواليه من اول البني ادمين لحد القطط و الكلاب اللي الناس بتدخل فيهم الجنة والنار ؟
هتقولوا ان اللي انا شفتهم دول قله من التفاح الفاسد ، لكم يا اصدقائي ابتسم في مرارة و اقول : ليه هو التفاح كله فسد فجأة؟ معلش اصل انا جبت اخري خلاص و برضه هقول لكم ليه .
عزيزتي الفتاه : كام مره ركبتي تاكسي او ميكروباص مع واحد مشغل قران و قعد يبص لك في المرايه ده لو ماحاولش يتحرش بيكي ؟
اعزائي المواطنين ، كام مره لاقيتم في حياتكم ناس بتتكلم عن ربنا و مش بتسيب المسجد و المصحف و اكتشفتم انهم في التعامل ، سوري و لامؤاخذة زبالة ؟
طيب كام مرة في رمضان ده شفتم ناس بتشتم بالدين و بتزق بعضها و بتتدافع لدرجة الموت في اتوبيس او ميكروباص؟ كام بنت اتشتمت و اتزقت و ملاقتش راجل يقف يتكلم عن حقها اللي ضاع من غير ما يقدم مساعدة حتي ؟ كام دكتور موت مريض و لا كام
موظف خد رشوة و لا كام ضابط عذب بني ادم ملوش ذنب ؟
و بعد كده وده اللي مجنني تلاقي حبايبكم اللي انتم عارفينهم بيتكلموا عناهمية ارتداء النقاب و عدم مصافحة النصاري و اضطهاد السافرات - اللي زيي كده - لحد ماربنا يهديهم . لا و اللطيف في الموضوع ان كل مانتكلم اكتر في الدين الناس يبقي ماعندهاش دين و كأن مقولة العظيم برنارد شو تتحقق و هي ان كل واحد بيتكلم في اللي ناقصه واحنا ناقصين دين علشان كده عمالين نتكلم فيه .الازمة اصبحت اننا حولنا الدين لشوية مظاهر فقط - و انا لا انكر علي اهمية المظاهر الواضحة للعيان - لكني اقول اننا اصبحنا نؤدي طقوس بلا روح يعني بنصلي طقوس و بنصوم طقوس و بنتحجب طقوس و بنحج طقوس لكن فتش علي القلي تلاقيه مخوخ ، و الجميل في الموضوع ان حبايبك يقولوا ان المظهر يقود الي الجوهر ، يا حلاوة يا ولاد ! ده كده يبقي السعوديين و العياذ بالله هم اكثر
اهل الارض تدين .
انا لا انكر باي شكل اني شفت ناس تعز الاسلام بجد مش بهزار و من بره زي من جوه ، و اكتر منهم شفت اللي من بره هلا هلا و من جوه يعلم الله و انا لا اعمم لكن الفت النظر لشئ اصبح سائدا بنسبة 99% بس ، و انا لست متشائمة لكني اريد حلا و انا بأدعي اني حريصة علي صورة الاسلام واكثر من تجار الدين اللي احالوا حياتنا جحيم .
ممكن ناس فيكم تقول ان الفقر و الاستبداد و كذا مليون سبب يوصلونا للمرحلة دي ، بس مفيش حاجة تبرر اننا نخلي الدين لبانة في افواهنا و نبقي احط من كفار قريش . طيب تعرفوا حاجه حلوة قوي : ان خالد بن الوليد و عمر بن الخطاب كانوا كرماء و بينصروا المظلوم قبل ما يعتنقوا الاسلام ، يعني و هم كفار او مشركين يعني ! حلوة صح ، احنا بقي فين من الناس دي و هم كفار لاننا مش هنقدر عليهم بعد اعتناقهم للاسلام .
و في رمضان و ياعيني علي رمضان : الصلاة و التراويح علي عينهم و المصحف في كل الايادي ، و الشوارع مليانة زبالة و الناس بتزق بعضها في المواصلات ده غير انعدام التكافل الاجتماعي ، طيب الصلاة مهمة و الصوم مهم و القران مهم جدا بس ايه فايدة كل ده من غير السلوك ؟ و الناس اللي بتقرا القرأن بتدقق في اللي هي بتقرأه؟ علي ضمانتي ما بيحصلش الا بنسبة 5 % علي الاكثر ما هو لو كل واحد ماسك مصحف في ايده فهم اللي بيقراه نص فهم ماكنش ده بقي حالنا باي شكل .
و بعد كل ده ييجي تجار الدين و انا شخصيا نفسي اعمل فيهم زي ما عمل اتاتورك في المتشددين و الاصوليين في تركيا ، و كلامي ده لا يمنع وجود علماء دين قمة في الاحترام بجد الواحد يقعد بين ايديهم لنهاية الدهر ياخد من علمهم و علمهم مايخلصش بس للاسف دايما الناس المحترمة صوتها واطي .
المهم بقي انهي التدوينة دي بأعتراف خطير علشان بس تعرفوا انا بعزكم قد ايه : و انا صغيرة بس مش قوي يعني و انا في الصف الاول الاعدادي لما جاء رمضان لقيت كل صحابي لبنات الحلوين اول يوم في رمضان لابسين حجاب ! طيب ليه يا جماعة ؟ علشان حرام انك تصومي من غير حجاب ! ما علينا ، المهم انهم سألوني : ايه ده انتي مش هتلبسي حجاب ؟ قلتلهم لا لان مش كويس انكم تلبسوه في رمضان و تقلعوه بعد رمضان ، و المهم لقيتهم وجههم راح الوان و اتهموني بالكفر و قلة الادب و تكرر الامر في الصف الثاني الاعدادي و الجديد في الموضوع بقي ان ناس منهم قالولي : هو بمزاج اهلك ؟! و قالةلي انتي فاكرة نفسك ايه و انتي غلطانة و قليلة الادب و مش مؤمنة و مبتعرفيش ربنا !!!!!! علما ان البنات دول كانوا بلا ادني مبالغة او انتقام من حثالة المدرسة : مشاغبات قمة في السفالة مع المدرسين و سلوك مش محترم بره و جوه المدرسة من الاعدادي ، المهم انا يومها قلت لنفسي : منين بيتكلموا عن الحجاب و ربنا و منين بيعملوا كدهو بأي حق يرموني بميت حجر و هم كلهم خطايا . و من يومها اتخذت قرار ني معملش غير اللي انا مقتنعة بيه بعقلي اللي خلقهولي ربنا لان ربنا هو العقل مش السطحية و الغباء ، حتي لو عقلي و اقتناعي ده وصلني لشرب القهوة في محكمة تفتيش او عند احمد باشا لاظوغلي .
كفاية بقي اعترافات النهارده
و رمضان كريم .

انتحر و لا اتنحر ؟؟؟؟؟

اثناء متابعتي للاخبار في الفترة الاخيرة ما بين التحقيق مع الصحفي الجرئ ابراهيم عيسي ، و فوز عبد الله جول بالنتخابات الرئاسة في تركيا ، و بين بعض الانشطة اللي كنت مشغولة بيها و اللي هحكي لكم عليها بعدين ، لفت نظري خبر جميل و لطيف و الخبر ده اول ما عرفته عرفته من والدي - بابا يعني - و الخبر ده بيقول ان ايمن اسماعيل انتحر !!!!! البقاء لله بس مين ايمن اسماعيل ده ؟ ايمن اسماعيل ده لمن لا يعرف هو المتهم اثاني في قضية التوكيلات المزورة اللي فبركها النظام المصري للزعيم الليبرالي و رئيس حزب الغد ايمن نور علشان يخلص من الدوشه اللي عاملها و يبعده عن المنافسة علي اللي بالي بالكم !

و بالمناسبة ايمن اسماعيل ده له قصة لطيفة و دمها خفيف حكاها لي والدي بصفته عضو في هيئة الدفاع عن الدكتور ايمن او عمو ايمن ما تفرقش ، ان في ايام جلسات المحاكمة اللي كانت قبل الانتخابات لما كان محاميي المتهمين الاخرين بيدافعوا عن متهميهم عن طريق سب الدكتور ايمن و التشكيك في كل تاريخه من اول نسبه لحد عقد زواجه و في الجلسة الثانية لما تمكن فريق الدفاع اللي كان والدي من ضمنه تحويل ساحة المحكمة من سوق الثلاثاء لساحة محاكمة شبه محترمة و اجبار القاضي و محاميي الخصوم علي احترام الاجراءات القضائية حدث و صاح احد المتهمين في القضية و هو ايمن اسماعيل و قال انه هيغير كل اقواله اللي قالها في النيابة ، و ان ايمن نور برئ و انه مازورش التوكيلات و انها مدسوسة عليه من ................ (اكمل بكلمة مناسبة ) و انه تم اجباره علي الاعتراف علي ايمن نور بعد ما احتجز البوليس ولاد اخته و هدد بتعذيبهم .

حلو قوي ، بعد كده دخلنا في دوامة الانتخابات ثم الانقسام المدبر داخل الحزب ، ثم انتخابات مجلس الشعب اللي تم بعدها مباشرة الانهاء علي ايمن نور من خلال المسرحية الكوميدية اللي حصلت علي يد قاضي اسمه عادل عبد السلام جمعة بيتحقق معاه في قضية رشوة بالمناسبة . و بعد كده ياتي السؤال اللي بيجمع و بيطرح نفسه :اين ذهب ايمن اسماعيل ؟ ايمن اسماعيل يا جماعة تم وضعه في سجن الاستئناف في حين تردد ان باقي المتهمين في القضية لم يتم حبسهم ، و قاعدين بره السجن و الحالة تمام ، و الاخ ايمن اسماعيل بيعاني من اضطهاد المساجين له و سوء المعاملة داخل السجن بجانب الضرب و الاهانة و ده استمر لحد ما سمعنا انه انتحر !

انتحر !!!!!!!!!! طيب ليه ما يكونش اتنحر يعني اجبر علي الانتحار ، او اتقتل يعني حد اتسلط عليه في السجن و قتله .لان بصراحة كده الحكاية بقت غريبة قوي ، اشمعني ده بالذات ينتحر و دلوقتي يعني ماكانش يعرف ينتحر من زمان ثم تاتي الاشاعات لتقول انه مختل عقليا كالمعتاد و نفسويته مش مستقره ! فاكرين كام واحد مختل ظهر في الاخبار في الكام سنه الاخيرة .

و علي فكره الحادثة دي فكرتني بانتحار وزير الداخلية السوري غازي كنعان بعد ان اشارت التحقيقات التي قام بها القاضي الالماني ميليس الي تورطه في اغتيال رئيس الوزراء اللبناني رفيق لحريري حيث اشار البعض الي ان الوزير السوري لم ينتحر و انما نحر يعني قتل او اجبر علي الانتحار .

المهم :

دكتور ايمن :

انت وحشتنا قوي و وحشت مصر كلها و كل اللي بيدور علي الحرية و مش لاقيها و يا ريت تحافظ علي صحتك علشان لما تطلع من السجن نعرف نكمل كلنا المشوار و كل رمضان و انت طيب و يارب رمضان اللي جاي تكون بتحتفل بيه مع اسرتك .

توقيع :

لو بطلنا نحلم نموت .

تخيل الارجنتين . Imagine Argentina .

كالمعتاد يبدو اني مش هبطل هوايتي المحببة في الكسل و التقاعس عن اداء واجبي التدويني لكني اليوم اعود و قد انتهت حالة الاكتئاب السابقة و الحمد لله علشان اكلمكم عن حاجة حلوة قوي ، و بداية احب اسأل :حد فيكم شاف فيلم ( تخيل الارجنتين ) أو :IMAGINE ARGENTINA ?

عموما لو ما حدش شافه مش مشكلة و دلوقتي هتعرفوا ليه ، الفيلم ده واضح من اسمه انه بيتكلم عن الارجنتين و تحديدا في حقبة السبعينات اللطيفة و اللي ربنا غضب علية و درس امريكا اللاتينية زي حالاتي اكيد هيكون عارف ان حقبة السبعينات في الارجنتين و معظم دول امريكا اللاتينية كانت حقبة سوده و منيلة بنيلة لان الارجنتين لوحدها شهدت حوالي من 20 الف الي 50 الف حالة اختفاء قصري لمعارضين و صحفيين و و مثقفين علشان النظام الارجنتيني حس انهم - الكلاب بتوع المعارضة - عاملين له صداع !!!

الفيلم بتدور احداثة حول البطل ( انطونيو بانديراس ) و هو فنان معارض للنظام المستبد ، تتعرض زوجته ( ايما تومسون ) للاختطاف علي يد البوليس السياسي الارجنتيني و في رحلته للبحث عنها و استمرار معارضته للنظام الفاشي من خلال مسرحياته تتعرض ابنته ايضا للاختطاف و يتعرض هو للضرب المبرح .

المهم بقي انه في رحلة البحث عن زوجته بيلتقي بضحايا التعذيب او الاعتقال و اسر الضحايا و كل واحد بيسرد مأساته ، لحد ما في اخر الفيلم بيعرف يلاقي مراته اللي هربت من المعتقل ، و طول الفيلم تلاحظ - عزيزي المشاهد - مشاهد التعذيب اللطيفة و الاغتصاب المستمر و المنهجي للمعتقلين و خصوصا للزوجة و الابنة لدرجة ان الضابط بيجيب الام و بيجيب امامها العساكر و بيطلب منها اختيار الشخص اللي هيغتصب بنتها !!! شئ قمة في البشاعة و انتهاك ادمية الانسان و عدم مراعاة انسانية الشخص بالاساس .

المهم - عزيزي المشاهد - لو اعصابك ضعيفة بلاش تشوف الفيلم و لو اعصابك قوية حاول تمسكها و ما تنهرش .

و انا بفتكر احداث الفيلم البشع ( تخيل الارجنتين ) طرأ علي دماغي سؤال اكيد مجنون :الواد محمد اللي عنده 12 سنه ده يعني ما يعرفش العمي من السما عمل ايه عشان عمو الضابط يطلع عليه ابداعات الدراسة في كلية الشرطة مضاف ليها كام سنه خدمة في الداخلية مضاف اليهم عقد نفسية كامنة منذ الطفولة - زي ما قال عمو سيجموند فرويد - و يعذبه بكل قسوة و وحشية و يصعقة بالكهربا في اماكن حساسة في جسمه و كمان يحقق الانجاز الاكبر و يضربة باله حادة في صدرة لدرجة تؤدي لثقب في القفص الصدري ؟يا تري عمل ايه محمد الله يرحمة؟ مشي في الشارع حافي ؟ و لا راح المدرسة من غير ما يعمل الهوم ورك ؟عمل ايه محمد حد يعرف ؟حد يعرف ازاي قدر انسان يعمل كده في طفل ممكن يكون زي ابنه ؟قولولي ازاي لان انا ماعدش فيا عقل علشان افكر و انا حاسه ان كل العالم اتجنن من حولي .

ليه ده يحصل ؟ الله يخرب بيت حقوق الطفل و حقوق الانسان اللي قرفنا منها من كتر الكلام عنها و هي قافلة عنيها و ساده ودنها عن محمد اللي ممكن يكون اخويا او اخ او ابن اي حد فينا . مش ممكن الولد ده يكون عالم و ياخد نوبل او يكون رجل قانون شريف او دكتور مشهور او مهندس عبقري او حتي ضابط بوليس مش بيعذب الاطفال .

ثم نأتي للموضوع الاجمل :ايه رايكم يا جماعه بعد كل ده البلد دي ينقعد فيها ؟ تعالوا اقول لكم فكره حلوة قوي : ايه رايكم كلنا - يعني ال80 مليون - نسيب البلد و نطفش و ساعتها بقي البوليس مش هيلاقي حد يعذبه صح ؟؟؟

الي كل شعب مصر احب اقول اني النهارده حاسه بالعار لاني عايشه في بلد بيموت فيها الاطفال مش بس بالسرطان لا كمان بالتعذيب ، لا فعلا صدق اللي قال ان مصر دي حاله متفرده من نوعها و اللي دايما يتكلموا عن خسوسية الحالة المسرية !!!

اخص عليكي يا مصر ما كانش العشم تعملي كده فينا ، طيب الارجنتين جايز يكون ليها مبرر و ده مش مجاله دلوقتي بس انتي ليه تعملي فينا كده ؟

بس مصر ترد و تقول : الناس اللي عذبوا و بيعذبوا دول مش ولادي و رفضوا انهم حتي يعتبروا دمي دمهم و عزلوا نفسهم عني من زمان .........................

يا بنتي بلاش تكوني انتي و الزمن عليا دا انا شوفت كتير و مش سهل علي الام انها تشوف ولادها بيموتوا امام عنيها ......

انتي قلبك انفطر علي واحد بس ، طيب انا قلبي بينفطر كل يوم من 3286 سنه من يوم ما دخل الفرس مصر ، كل يوم قلبي بينحرق و انا كاتمة حزني جوا قلبي .

و تبكي مصر و اجن انا و اعود لاسألها : طيب يا مصر ليه ده بيحصل و ليه وصلنا للمرحلة القاسية دي ؟

فتجيب مصر و كان ليا مع مصر حديث طوييييييل تشوفوه الحلقة القادمة ان شاء الله و محدش اعتقلني بتهمة الفضفضة مع مصر ....